ТАҶЛИЛИ СОЛГАРДИ ИНҚИЛОБИ БУЗУРГИ ФАРОНСА

               Душанбе, 15 июл. (АМИТ «Ховар», Наргис Бояхмедова). — Сафорати Фаронса дар Тоҷикистон дирӯз ба муносибати солгарди навбатии Инқилоби бузурги Фаронса ва рӯзи ишғоли Қалъаи Бастилия зиёфати идона орост. Ба он намояндагони Ҳукумати Тоҷикистон, намояндагони созмонҳои байналхалқӣ, дипломатҳо, олимон, ходимони санъату ҳунар ва намояндагони воситаҳои ахбори оммавӣ даъват карда шуданд.               Аз таърих маълум аст, ки 14 июли соли 1789 дар Париж шӯриши бузург ба амал омад. Шӯришгарон қалъа ва ҳабсхонаи Бастилияро ишғол намуда, маҳбусони сиёсии онро озод намуданд. Аз ҳамон вақт сар карда, 14 июл ҳамчун рӯзи оғози Инқилоби бузурги Фаронса ҷашн гирифта мешавад.               Дирӯз дар Фаронса ба ин муносибат расми гузашти низомӣ баргузор гардида, дар назди Манораи Эйфел ва майдони назди қасри президент аз тӯпҳо шиллик парронда шуд.