«ТАЛКО» БО АШЁИ ХОМИ МАҲАЛЛӢ ФАЪОЛИЯТ ХОҲАД КАРД

                       Душанбе, 21 июл. (АМИТ «Ховар», Лаззат Диловарзод).- Бино ба иттилои котиби матбуотии КВД «ТАЛКО» Саёҳат Қодирова, соли дуюм аст, ки дар барномаи гузариши Ширкати Алюминийи Тоҷик бо ашёи хоми маҳаллӣ олимону мутахассисони тоҷик корҳои тадқиқотӣ мебаранд.                      Тибқи ваъдаи металургҳо дар муддати 5 сол корхона 60 фоиз бо гилхок, фториди алюминий, криолит ва ангишти антратсити ноҳияи Рашт ва таҷҳизоту қисмҳои эҳтиётии худӣ таъмин карда мешавад.                      Бино ба иттилои ҳамин манбаъ, алҳол қариб 90 фоизи ашёи хом ва таҷҳизоти зарурӣ ба Ҷумҳурии Тоҷикистон аз хориҷ ворид карда мешавад.                       Бояд тазаккур дод, ки ширкати мазкур танҳо барои ҳамлу нақли гилхок аз хориҷи кишвар дар як сол беш аз 150 млн. доллари амрикоӣ сарф мекунад. Дар сурати аз маҳсулоти хоми маҳаллӣ истифода кардан, даромади солонаи он метавонад боз як баробар зиёд гардад.