ҚОЧОҚЧИЁНИ ӮЗБЕК ДАСТГИР ШУДАНД

                    Тошканд, 16 август. (АМИТ «Ховар» — Лента. ру). — Дар Ӯзбекистон ду мошини боркаши «КАМАЗ» дастгир карда шуд, ки ба Русия моддаи нашъадори героин мебурд.                    Ба Хадамоти амнияти миллӣ ва мақомоти дигари муҳофизи қонуни Ӯзбекистон хабар дода шуд, ки қочоқчиён маводи нашъадорро аз ноҳияи Бекободи вилояти Тошканд ба воситаи мошинҳои боркаш ба Қазоқистон ва аз он ҷо ба Русия бурдан мехоҳанд.       Кормандони мақомоти дахлдор роҳҳои имконпазири ҳаракати мошинҳоро муайян намуда, онҳоро дар роҳи мошингарди Тошканд — Чиноз боздоштанд. Мувофиқи ҳуҷҷатҳо, ба воситаи мошинҳо ба Федератсияи Русия 22 тонна себ бурда мешуд. Вале зимни кофтуков дар зери қуттиҳои себ 20 баста моддаи нашъадори героин ёфт шуд, ки вазни умумии он 126 килограмм буд.                     Кормандони милиса вобаста ба ин воқеа шаш сокини ноҳияи Бекободро дастгир намуданд. Баъдан боз як сокини ҳамин ноҳия бо гумони шарокаташ ба қочоқи маводи нашъадор дастгир шуд.                    Нисбати ҷинояткорон парвандаи ҷиноӣ кушода шуд ва тафтиши он давом дорад.