КОНСЕРТИ КАЛОН БАХШИДА БА РӮЗИ ИСТИҚЛОЛИЯТ

                 Душанбе, 20 август. (АМИТ «Ховар», Таҳмина Ғоибназарова).-9 сентябр консерти калон бахшида ба 18-солагии Рӯзи Истиқлолият дар толори «Кохи Борбад» баргузор мегардад.                Дар барномаи консертӣ беҳтарин ҳунармандони эстрадаи тоҷик ҳунарнамоӣ хоҳанд кард. Консертро дастаи ҳунармандони ҷавони гурӯҳи «Истиқлол»-и театри ба номи А. Лоҳутӣ таҳти мусиқии оркестри давлатии театри опера ва балети ба номи С. Айнӣ оғоз мекунад.               Дар давоми намоишномаи консертӣ гурӯҳи рақсии ансамбли «Лола» ва ҳунармандони варзидаи Филармонияи давлатии Тоҷикистон ҳунарнамоӣ мекунанд.  Ҳунармандони театри опера Рустам Дуллоев ва Адҳам Халиков порчаҳоро аз асари саҳнавии «Травиата» ва «Аттила» иҷро хоҳанд кард. Инчунин дар консерт ансамблҳои рақсии «Зебо», «Гулрез» ва «Рухшона» ҳунарнамоӣ мекунанд.