М. РАҲИМОВ: «ШАБИ «ЛАЙЛАТУЛҚАДР»-РО БО НИЯТҲОИ НЕК ИСТИҚБОЛ НАМОЕД!»

                  Душанбе, 16 сентябр.(АМИТ «Ховар», Марзия Саидова).-Шаби Қадр, ки мусулмонони тамоми ҷаҳон онро шаби 27 моҳи шарифи Рамазон истиқбол мегиранд, ба шаби панҷшанбеи 17-уми сентябр рост меояд.                  -«Бузургии шаби «Қадр» дар он аст, ки дар ин шаби муборак китоби осмонӣ — Қуръони Шариф ба замин нозил шуд ва Қуръони карим башоратест аз азамати ин шаб», гуфт дар сӯҳбат ба хабарнигори АМИТ «Ховар» муовини раиси Шӯрои уламои ҷумҳурӣ Маъруфуллоҳ Раҳимов.                    Дар ин шаб мусулмонон ҳақиқӣ нахобида, то субҳидам ба тоату ибодат ва қироати Қуръони азимушшаън машғул мешаванд. Аз даргоҳи Яздони пок омӯрзиши гуноҳҳояшонро хоҳиш менамоянд. Дилу нияти худро пок сохта, даст ба дуои нек мебардоранд. Зеро дар ин шаб фариштаҳо аз осмон ба замин фуруд меоянд ва ниятҳои мусулмононро мустаҷоб мегардонанд.                     Маъруфуллоҳ Раҳимов афзуд, ки шаби «Қадр» беҳтар аз ҳазор моҳ буда, дар ин шаби муборак иншоолоҳ ҳамаи орзую ниятҳои мусулмонон ҷомаи амал хоҳад пӯшид.