РАИСИ ВИЛОЯТ ШОИРАИ ҶАВОНРО БА НАМОИШГОҲ МЕФИРИСТАД

                 Душанбе, 3 сентябр. (АМИТ «Ховар», Бекназари Абӯбакр). — Раиси вилояти Суғд Қоҳир Расулзода бо мақсади ташкил намудани сафари ҳунарии кормандони муассисаҳои давлатиии «Театри мусиқӣ-мазҳакаи ба номи Камоли Хуҷандӣ», «Театри мусиқии тамошобинони ҷавон» ва «Театри лӯхтаки шаҳри Чкалов» ба навоҳии Айнӣ, Кӯҳистони Мастчоҳ ва шаҳри Панҷакент қарор имзо кард.                   Мувофиқи ин қарор аз ҳисоби барзиёд иҷрошавии қисми даромади буҷети маҳаллӣ нисбат ба нақша ба театри ба номи Камоли Хуҷандӣ 4 ҳазор сомонӣ, ба театри мусиқии тамошобини ҷавон 4 ҳазор сомонӣ ва ба театри лӯхтаки шаҳри Чкалов 3 ҳазор сомонӣ ҷудо шуд.                Тибқи қарори дигари раиси вилоят барои пардохт кардани хароҷоти сафари шоираи ҷавон Дилором Солибоева ҷиҳати иштирок дар намоишгоҳи байналхалқии китоб дар шаҳри Москва, аз ҳисоби Фонди захиравии раиси вилоят 3 ҳазору 500 сомонӣ ҷудо гардид.                Аз маркази иттилоот ва таҳлили дастгоҳи раиси вилояти Суғд ба АМИТ «Ховар» иттилоъ доданд, ки инчунин, бо қарори раиси вилояти Суғд Қоҳир Расулзода аз санаи 15-сентябр то 24 ноябри соли ҷорӣ дар шаҳру навоҳии вилоят Рӯзи фарҳангии ҷавонон доир мегардад.