ҶАЛАСАИ НАВБАТИИ 7-УМИ ШӮРОИ ТАНДУРУСТӢ

                Душанбе, 15 октябр. (АМИТ «Ховар», Ибодат Давлатова).- Аз 15 то 16 октябри соли равон дар шаҳри Остонаи Ҷумҳурии Қазоқистон ҷаласаи навбатии 7-уми Шӯрои тандурустии Давлатҳои аъзои Иттиҳоди иқтисодии Авруосиё (ЕврАзЭс) баргузор мегардад.                  Тавре аз Вазорати тандурустии ҶТ иттилоъ доданд, дар ҷаласаи мазкур масъалаҳои рафти иҷрои қарорҳои ҷаласаи шашуми Шӯро, оид ба рафти амалигардонии Самтҳои афзалиятноки рушди Иттиҳоди иқтисодии Авруосиё, оид ба лоиҳаи консепсияи барномаи байнидавлатии мақсадноки «Саломатии мардуми Иттиҳоди иқтисодии Авруосиё», оид ба лоиҳаи Низомнома дар бораи бақайдгирии (азнавбақайдгирии) маводи доруворӣ дар давлатҳои аъзо, чорабиниҳо бахшида ба муносибати даҳсолагии таъсиси Иттиҳоди иқтисодии Авруосиё, лоиҳаи Низомномаи ҳамкории давлатҳои аъзои Иттиҳод дар соҳаи мубориза бо бемориҳои сироятӣ баррасӣ мегарданд.                  Аз Ҷумҳурии Тоҷикистон дар ин ҷаласа вазири тандурустии Ҷумҳурии Тоҷикистон Нусратулло Салимов ва сардори раёсати ислоҳот ва робитаҳои байналмилалӣ Сафар Сайфуддинов ширкат меварзанд.  Бояд хотиррасон кард, ки ҷаласаи мазкурро вазири тандурустии Ҷумҳурии Тоҷикиcтон Нусратулло Салимов сарварӣ мекунад, ки ин барои рушди масъалаҳои соҳаи тандурустӣ заминаи боэътимоде хоҳад гузошт.