ҶАЛБИ ИНВЕСТИТСИЯИ ХОРИҶӢ БА ИҚТИСОДИЁТИ ТОҶИКИСТОН

                  Душанбе, 27 октябр. (АМИТ «Ховар», Покиза Маҳмадбекова). – «Портфели лоиҳаҳои инвеститсионии амалкунандаи Ҳукумати Ҷумҳурии Тоҷикистон ба ҳолати якуми октябри соли равон 59 лоиҳаро дар бар мегирад, ки маблағи умумии он 1,842 миллиард доллари амрикоиро ташкил медиҳад», — гуфт зимни нишасти матбуотӣ муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Шуҳрат Раҳматбоев.                   Мавсуф афзуд, ки азхудкунии маблағҳо дар нӯҳ моҳи соли ҷорӣ 210,1 миллион доллари амрикоиро ташкил дода, татбиқи лоиҳаҳо дар соҳаҳои гуногуни иқтисодиёти мамлакат ҷараён мегирад. Дар баробари ин дар ин давра ҷалби сармоягузории мустақими хориҷӣ зиёда аз як миллиард сомониро ташкил медиҳад. Кумита барои ҷалби бештари сармоягузорони ватанию хориҷӣ ба иқтисодиёти мамлакат диски нави инвеститсионӣ пешниҳод намуд.                    Ҳамзамон, барои густариши ҳамкориҳо якчанд форум ва вохӯриҳо бо соҳибкорон ва сармоягузорони Арабистони Саудӣ, Хорватия, Хитой, Туркия, Федератсияи Руссия, Олмон, Ҷумҳурии исломии Эрон ва Ҳиндустон гузаронида шуд.