ЧИТЧИЁН АЗ «САНГТӯДА-2» БОЗДИД НАМУД

                «Душанбе, 23 октябр.(АМИТ «Ховар», Марзия Саидова).-Муовини вазири энергетикаи Ҷумҳурии Исломии Эрон муҳандис Ҳамиди Читчиён шоми 22 октябр ба Душанбе омад.                  Аз Сафорати Эрон дар Душанбе ба АМИТ «Ховар» иттилоъ доданд, ки ҳадафи асосии сафари Ҳамиди Читчиён ба Тоҷикистон шиносоӣ бо ҷараёни корҳои сохтмонӣ дар НБО «Сангтӯда-2» аст, ки аз ҷониби ширкати «Сангоб»-и Ҷумҳурии Исломии Эрон сохта мешавад. Бо ин мақсад муовини вазири энергетикаи Эрон субҳи 23 октябр ба маҳалли сохтмони НБО-«Сангтӯда-2» рафт.                 Дар назар аст, ки муовини вазири энергетикаи Эрон бо Президенти Ҷумҳурии Тоҷикистон Эмомалӣ Раҳмон, вазири молияи ҷумҳурӣ Сафаралӣ Наҷмиддинов, Раиси Бонки миллии Тоҷикистон Шариф Раҳимзода ва муовини вазири энергетика ва саноати Тоҷикистон дидору мулоқот намуда, масъалаҳои таҳкими ҳамкориҳоро дар бахши энергетика баррасӣ менамоянд.                  Ҳамиди Читчиёнро дар сафар ба Тоҷикистон мудирони Бонки тавсеаи содироти Эрон ва Сандуқи кафолати арзии ин кишвар ҳамроҳӣ менамоянд.