ФАКУЛТА ДОРОИ ОЗМОИШГОҲҲО ШУД

                Душанбе, 15 октябр.(АМИТ «Ховар», Марзия Саидова).- Дар факултаи тайёр кардани технологияи маҳсулоти хӯроквории Донишгоҳи технологии Тоҷикистон 4 озмоишгоҳи кимиёвӣ барои ташхис кардани маҳсулоти хӯрокворӣ ва технологияи тайёр кардани онҳо ба истифода дода шуд.                 Лабораторияҳои мазкур бо ташаббуси Агентии «Тоҷикстандарт» ва Донишгоҳи технологии Тоҷикистон насб карда шудааст. Дар байни онҳо озмоишгоҳи маҳсулоти ширӣ ва гӯштӣ, озмоишгоҳи об, нӯшокиҳои спиртӣ ва ғайриспиртӣ, озмоишгоҳи маҳсулоти ғаллагӣ ва қаннодӣ, озмоишгоҳи маҳсулоти консерва, равған ва чарм ташкил карда шудааст.                 Аз маркази матбуоти Агентии «Тоҷикстандарт» ба АМИТ «Ховар» иттилоъ доданд, ки озмоишгоҳҳо истеҳсоли кишварҳои Русия, Чин ва Олмон буда, дар омода намудани мутахассисони баландтаҷрибаи соҳаи тайёр кардани технологияи маҳсулоти хӯрокворӣ нақши муассир мегузоранд. Минбаъд донишҷӯёни факултаи мазкур ба Агентии «Тоҷикистандарт» нарафта, дар озмоишгоҳҳои донишгоҳ таҷриба мегузаронанд.