МД «ТЕЛЕВИЗИОНИ САФИНА» АЗ ФАЪОЛИЯТИ НӮҲМОҲА НАТИҶАГИРИ КАРД

                 Душанбе, 9  октябр. (АМИТ «Ховар», Ибодат Давлатова ). – «Нӯҳ моҳе, ки аз соли 2009 сипарӣ гардид, ҳаёти сиёсиву иқтисодӣ ва иҷтимоию фарҳангии ҷумҳурии соҳибистиқлоламон саршор аз рӯйдоду воқеоти фараҳбахш буд ва аҳли эҷодии мо то ҷои имкон тамошобини дохил ва хориҷи кишварро дар ҷараёни онҳо қарор доданд»,- қайд намуд дар нишасти матбуотӣ муовини аввали раиси Муассисаи давлатии «Телевизиони Сафина» Абдурашид Хуҷамқулов.                  Муассиса дар ин давра корҳои таблиғотиву ташвиқотиро дар самти сазовор истиқбол гирифтани 20-умин солгарди истиқлолияти давлатии ҶТ ва Соли бузургдошти Имоми Аъзам ба таври васеъ ба роҳ монда, як қатор барномаҳои илмӣ — адабӣ ва фарҳангию маърифатӣ таҳия ва пешкаши бинандагон намуданд.                 Ҳамчунин бо тавсияи Шӯрои бадеии Муассисаи филми мустанади «Чароғи ҳидоят» ба навор гирифта шуда, ки рӯзҳои Симпозиуми байналмилалии «Мероси Абӯҳанифа ва аҳмияти дар муколамаи тамаддунҳо» дар эфир пахш гардид. Дар баробари ин чорабинӣ, конфронсу семинарҳои бахшида ба Соли бузургдошти Имоми Аъзам, ки дар ташкилоту муассиса ва корхонаву идораҳо дар ин муддат доир гардиданд, дар гузоришҳои таҳлилии барномаҳои иттилоотиӣ инъикоси саривақтии худро пайдо намуданд.                  Инчунин, бояд қайд намуд, ки дар тӯли нӯҳ моҳи сипаригардида кормандони идора 18 филми бадеӣ ва 35 филми мустанадро тарҷума ва дубляж карданд.