МУШКИЛОТИ ПОЙГОҲИ НИЗОМИИ ФЕДЕРАТСИЯИ РУСИЯ

                 Москав, 23 октябр. («Ховар-АНИА-ИТАР-ТААС»). — Масъалаи пардохти маблағи муайян барои будубоши пойгоҳи низомии Федератсияи Русия дар ҳудуди Тоҷикистон, айни ҳол муҳокима нашудааст.                  «Масъала аз нигоҳи пардохтан ва ё напардохтани маблағ баррасӣ нашудааст, мо ҳоло роҳи баробар ҳисоб кардани маблағро пайдо накардаем», — хабар дод ба рӯзноманигорон вазири мудофиаи Русия Анатолий Сердюков пас аз мулоқоти президентони ҳар ду кишвар.                   А.Сердюков ёдовар шуд, ки «Пойгоҳи низомии 201 дар ҳудуди Ҷумҳурии Тоҷикистон дар асоси созишномае, ки мӯҳлаташ соли 2014 ба анҷом мерасад, қарор дорад». Айни ҳол гурӯҳи корӣ бо роҳбарии вазири мудофиаи Федератсияи Русия Анатолий Сердюков ва вазири корҳои хориҷии Ҷумҳурии Тоҷикистон Ҳамрохон Зарифӣ шарту шароитҳои Созишномаи навро коркард мекунанд. «Пойгоҳи низомӣ ё мисли аввала бе пардохти маблағ ва ё дар асоси пардохти маблағи муайян фаъолият хоҳад кард», — иттилоъ дод А.Сердюков. Ба ақидаи ӯ «ҷонибҳо дар омода кардани ҳуҷҷатҳо ба пешравиҳо ноил шудаанд, кор дар ин самт мутобиқи нақша ва босамар давом дорад».                   Аз натиҷаи фаъолияти гурӯҳи корӣ гузориш ба Президентони ҳар ду мамлакат омода карда мешавад, пас аз ин роҳбарони кишварҳо қарори дахлдор қабул хоҳанд кард.