ҶАЛАСАИ 44 -И ШӮРОИ ИҚТИСОДИИ ИДМ

                  Душанбе, 5 декабр.(АМИТ «Ховар», Покиза Маҳмадбекова) — 11 декабри соли ҷорӣ дар шаҳри Маскав ҷаласаи 44 Шӯрои иқтисодии ИДМ баргузор мегардад. Дар ин ҷаласа вазири рушди иқтисод ва савдои Ҷумҳурии Точикистон Фаррух Ҳамралиев иштирок хоҳад кард.                    Тавре ба мухбири АМИТ «Ховар» аз вазорати рушди иқтисод ва савдои мамлакат иттилоъ доданд, дар ин ҳамоиш баррасии 12 масъала, аз ҷумла таъсис ва рушди шабакаҳои иттилоотии байнидавлатӣ оид ба интиқоли амвол ва хизматрасонӣ дар бозорҳои миллӣ, дар амал татбиқ намудани нишондодҳои Барнома оид ба боло бурдани сатҳи зиндагӣ, эътироф кардани имтиёзҳои собиқадорони ҶБВ ва шахсони ба онҳо баробар дар давлатҳои Иттиҳод, инчунин дигар масоили иҷтимоӣ ва иқтисодии кишварҳои ИДМ, ба нақша гирифта шудааст.