САРМО САДДИ БУНЁДКОРӢ НАМЕШАВАД

                  Хоруғ, 15 декабр. (АМИТ «Ховар», Лутфишо Додо). — Ҳарҷанд зимистони Бадахшон қаҳратун бошад ҳам, ҷараёни кор дар иншоотҳои иҷтимою фарҳангии вилоят аз рӯи реҷа идома дорад. Чунончӣ, кор дар бунёди Литсеи Президентӣ барои хонандагони лаёқатманд, хобгоҳ барои донишҷӯёни Донишгоҳи давлатии шаҳри Хоруғ, маркази ҷавонон, студияи телевизиони вилоят, театри вилоятӣ бинои 5 – ошёнаи истиқоматӣ ва ғайра босуръату сифати баланд идома дорад.                    Иншоотҳо бо масолеҳи бинокорӣ ва қувваи корӣ таъмин буда, маоши бинокорон сари вақт пардохт мешавад. Тибқи нақша кулли иншоотҳои азим, ки дар мавриди баҳрабардорӣ қарор додани он Президенти кишвар шахсан ширкат меварзад, дар рӯзҳои умумиҷумҳуриявии Ваҳдат, ки соли оянда дар вилоят таҷлил мегардад, мавриди истифодабарӣ қарор дода мешаванд.