«ТОҶИКСТАНДАРТ»: — БОЗОРҲОИ ДУШАНБЕ ДОРОИ ШАҲОДАТНОМАИ ХИЗМАТРАСОНӢ НЕСТАНД!

                    Душанбе, 14 январ. (АМИТ «Ховар», Бекназари Абӯбакр). — «Ягон бозори шаҳри Душанбе дорои шаҳодатномаи хизматрасонӣ нест, зеро то имрӯз бозорҳои пойтахт шартҳои чорабиниҳои пешниҳоднамудаи Агентии давлатии «Тоҷикстандарт»-ро ҷиҳати ба танзим даровардани бозор ва ба стандартҳо мутобиқ намудани онро пурра иҷро накардаанд», — зикр гардид дар нишасти матбуотии роҳбарияти Агентии стандартизатсия, метрология, сертификатсия ва нозироти савдои назди Ҳукумати ҶТ, 14 январи соли ҷорӣ.                       Қайд карда шуд, ки то ҳол дар бозорҳои молҳои хӯрокаи шаҳри Душанбе камбудиҳои ҷиддӣ, аз ҷумла ба фурӯш гузоштани молҳои зудвайроншаванда бе доштани таҷҳизоти хунуккунанда, ки яке аз талаботҳои асосии босифат нигоҳ доштани маҳсулот мебошад, мавҷуданд. Дар давоми соли 2009, танҳо дар бозори «Саховат»-и пойтахт бинобар сабаби надоштани таҷҳизоти хунуккунанда ба 28 нафар соҳибкорон амрияҳои ислоҳӣ ва ҷарима баста шуд. Аз ин рӯ, «Тоҷикстандарт» тасмим гирифтааст, ки дар соли 2010 то ҷойи имкон ин камбудиро дар бозорҳо бартараф намуда, сатҳи хизматрасониро дар онҳо таъмин намояд.                         Маврид ба зикр аст, ки дар давоми соли 2009 аз ҷониби Агентии «Тоҷикстандарт» 142 тонна маҳсулоти макаронӣ, 3 ҳазору 84 тонна орду гандум, 131 тонна мурғи тухм ва дигар маҳсулот ғайристандартӣ дониста шуда, тибқи тартиби муайяншуда аз нав коркард ва ё нобут карда шуданд.