М. БОЛТУЕВ: «ВАРАҚАҲОИ ОВОЗДИҲӢ ХУСУСИЯТИ МУҲОФИЗАТӢ ДОРАНД»

Душанбе, 19 феврал.(АМИТ «Ховар», Марзия Саидова).-Назар ба иттилоъи Раиси Комиссияи марказии интихобот ва раъйпурсии Ҷумҳурии Тоҷикистон Мирзоалӣ Болтуев ҷиҳати баргузории интихоботи Маҷлиси намояндагони Маҷлиси Олии Ҷумҳурии Тоҷикистон ва Маҷлисҳои маҳаллии вакилони халқ, ки 28 феврали соли 2010-ум таъйин шудааст, 16 миллион варақаи раъйдиҳӣ (бюллетенҳо) чоп карда шуд. Коғаз барои чопи варақаҳои овоздиҳӣ аз шаҳри Санкт-Петербурги Федератсияи Русия оварда шудааст. Варақаҳои овоздиҳӣ дар нашриёти «Шарқи озод» бо маблағи 800 ҳазор сомонӣ нашр шуда, ботадриҷ ба минтақаҳои ҷумҳурӣ фиристонида мешаванд. Аз ҷумла,  дирӯз тавассути ҳавопаймо ба вилояти Суғд 11 тонна варақаи райъдиҳӣ интиқол дода шуд. Мирзоалӣ Болтуев афзуд, ки ҳар як  интихобкунанда 5 варақаи райъдиҳӣ — варақаи раъйдиҳӣ барои ҳизбҳои сиёсӣ, номзадҳои ҳавзаи ягонаи умумиҷумҳуриявӣ, вилоятҳо, шаҳрҳо ва ноҳияву деҳотро дастрас менамоянд. Варақаҳои раъйдиҳӣ ҳафт дараҷаи муҳофизатӣ дошта, метавонанд  аз раванди тақаллубкорӣ дар ҷараёни интихобот ҷилавгирӣ намоянд ва шаффофу беғараз гузаштани  интихоботро таъмин созанд. Ичунин,  варақаҳои раъйдиҳӣ барои нуқтаҳои овоздиҳӣ дар хориҷи кишвар низ чоп шудааст, ки дар он рӯйхати 41 ҳавзаи интихоботӣ бо номзадҳояш дарҷ гардидааст. Аллакай, ба Сафорати Ҷумҳурии Тоҷикистон дар Федератсияи Русия  1, 5 тонна варақаи раъйдиҳӣ фиристонида шуд. Тибқи қонун бояд варақаҳои  овоздиҳӣ 7 рӯз пеш аз интихобот ба ҳавзаҳо ва ду рӯз пеш аз баргузории интихобот ба участкаҳои интихоботӣ расонида шаванд. Бояд зикр кард, ки дар интихоботи қарибулвуқӯъи парлумонӣ  дар Ҷумҳурии Тоҷикистон 3 миллиону 400 ҳазор нафар интихобкунанда раъй хоҳанд дод.