БОНКИ НАВИ АВРУПОӢ ДАР ТОҶИКИСТОН

Душанбе, 30 март. (АМИТ «Ховар», Бекназари Абӯбакр). — Дар Тоҷикистон бонки нави қарздиҳӣ ба фаъолият оғоз намуд. Ҷамъияти саҳҳомии пӯшидаи «Аксесбонк Тоҷикистон» аз тарафи 4 ташкилоти молиявии байналхалқӣ таъсис дода шудааст, ки дар маҷмӯъ маблағгузории он 48 миллион сомониро ташкил медиҳад. Аз ҷумла, саҳми Аксэс Майкрофайнэнс Холдинг АГ-и Олмон 52%, Бонки таҷдиду рушди Аврупо ва Корпоратсияи байналмилалии молиявӣ18%-ӣ ва Бонки рушди Олмон 12% мебошад. «Аксесбонк Тоҷикистон» бо соҳаи моликияти хусусӣ ва аҳолии дорои даромади паст ва миёна кор карда, дар аввал додани қарзҳои хурд, маблағгузорӣ ба хоҷагии қишлоқ ва интиқоли маблағро ба роҳ мондааст. Дар назар аст, ки давоми 5 соли оянда 17 филиали ин бонк дар шаҳру ноҳияҳои ҷумҳурӣ кушода шаванд. Барои ёрдами техникии «Аксесбонк Тоҷикистон» дар роҳи вусъат ва кушодани филиалҳои бонк дар минтақаҳо маблағҳои бебозгашти ҳукуматҳои Австрия, Олмон, Ҷопон ва Люксенбург истифода бурда мешаванд. Гуфтанист, ки бонки мазкур аз тарафи гурӯҳи роҳбарони хориҷии ботаҷриба идора шуда, ҳиссаи бузурги кормандонро шаҳрвандони Тоҷикистон ташкил медиҳанд. Айни ҳол дар ин бонк 69 нафар корманди маҳаллӣ фаъолият дошта, раванди интихоб ба ҷойҳои корӣ, дар баробари вусъатёбии шумораи нави шуъба ва филиалҳои бонк, меафзояд.