БОЗЁФТИ ПИНҲОНГОҲИ АСЛИҲА

            Душанбе, 26 март. (АМИТ «Ховар», Жасмин Назарова). – Аз ҷониби кормандони раёсати мубориза бар зидди ҷиноятҳои муташаккилонаи ВКД ҶТ дар якҷоягӣ бо кормандони шӯъбаи корҳои дохилии ноҳияи Рӯдакӣ дар ҳудуди ҷамоати Султонобод шаҳрванд Маҳмудхон Икромов, соли таваллудаш 1969, истиқоматкунандаи ҷамоати номбурда дастгир карда шуд.  Тавре ба хабарнигори АМИТ «Ховар» аз дафтари матбуоти Вазорати корҳои дохилии ҶТ иттилоъ доданд, ҳангоми кофтукови шахсӣ аз ӯ як адад яроқи тамғаи ТОЗ – 8 дарёфт ва мусодира карда шуд. Мувофиқи маълумоти раёсати ташхиси криминалии ВКД ин яроқ коршоям буда, метавонист ҳодисаи нохуш рӯй диҳад. Нисбати ин далел парвандаи ҷиноӣ оғоз шуда, тафтишот идома дорад.