ГУСТАРИШИ МУНОСИБОТИ ИҚТИСОДИИ ТОҶИКИСТОНУ ОЛМОН

Душанбе, 30 март. (АМИТ «Ховар», Бекназари Абӯбакр). — Имрӯз дар шаҳри Душанбе бо мақсади рушди муносибатҳои молиявӣ ва техникӣ байни Ҳукумати Ҷумҳурии Федеролии Олмон ва Ҳукумати Ҷумҳурии Тоҷикистон миёни ҳайатҳои ин ду кишвар машварат оғоз гардид, ки ду рӯз идома мекунад.  Ҳадафи аслии ин машварат омода намудани созишномаҳои ҳамкории байниҳукуматӣ барои солҳои 2010-2011 ва гузаронидани мулоқоти ҷонибҳо дар тирамоҳи соли ҷорӣ мебошад. Ҷонибҳо изҳор намуданд, ки самти асосии ҳамкорӣ дар оянда низ «Рушди устувори иқтисодӣ» маҳсуб ёфта, соҳаҳои тандурустӣ, молия, энергетика, таълимоти касбй ва рушди инноватсионӣ низ дастгирӣ карда мешаванд. Мухбири АМИТ «Ховар» иттилоъ медиҳад, ки дар ҷараёни машварат, ҳамчунин масъалаҳои вобаста ба лоиҳаҳои татбиқшавандае, ки аз ҷониби Ҳукумати Олмон маблағгузорӣ карда мешаванд, мавриди баррасй қарор дода мешаванд. Аз ҷумла, таҷдиди беморхонаи касалиҳои сили «Мачитон», сохтмони мактабҳои нав дар вилояти Хатлон, беҳтарнамудани хизматрасонии тиббӣ ба занони ҳомиладору кӯдакони навзод ва барқарор намудани инфрасохтори коммуналӣ мебшанд. Ҳамчунин масъалаҳои соҳаи энергетика, аз қабили иваз намудани таҷҳизоти барқтақсимкунандаи 220/500 кB-и НБО «Норак» ва сохтмони НБО-и хурд дар ноҳияи Мурғоби ВМКБ маврди муҳокима қарор мегиранд.