ИФТИТОҲИ МАРКАЗИ МИНТАҚАВИИ МАЪРИФАТӢ

Душанбе,  30  март. (АМИТ «Ховар», Ибодат Давлатова).-   29 марти соли ҷорӣ  дар Маркази ташхиси шаҳри Душанбе маросими кушодашавии  Маркази минтақавии маърифатӣ оид ба муҳоҷират ва бемории норасоии масунияти бадан (СПИД) доир гардид. Тавре ба мухбири АМИТ «Ховар»   аз Хадамоти  муҳоҷирати ВКД ҶТ иттилоъ доданд,   маркази мазкур дар доираи амалисозии лоиҳаи минтақавӣ таҳти унвони «Пешгирии СПИД миёни муҳоҷирони корӣ дар кишварҳои Осиёи Марказӣ» мавриди истифода қарор гирифт. Бино ба иттилои манбаъ, марказ баҳри бо омӯзиши масъалаҳои муҳоҷират ва бемории СПИД-у пешгирии он фаро гирифтани кормандони бахшҳои давлатӣ (табибон, кормандони вазорату идораҳо) ва ғайридавлатӣ (намояндагони созмонҳои ғайриҳукуматӣ)-и кишварҳои иштирокчии лоиҳа — Тоҷикистон, Қазоқистон, Ӯзбекистон ва Қирғизистон пешбинӣ шудааст. Зикр гардид, ки ҳамаи корхонаву ташкилотҳо ва шахсони алоҳида бобати масъалаҳои муҳоҷират ва бемории СПИД метавонанд аз маркази мазкур адабиёту маводи зарурӣ ва кӯмаки иттилоотӣ дастрас намоянд.