МАҶЛИСИ ШӮРОИ ВАЗИРОНИ КОРҲОИ ХОРИҶӢ ДАР ДУШАНБЕ БАРГУЗОР МЕГАРДАД

Душанбе, 12 март. (АМИТ «Ховар», Фарангис  Раҳимова). —   Аз  18  то  20  майи  соли  равон  дар  шаҳри  Душанбе  иҷлосияи  37 – уми  шӯрои  вазирони  корҳои  хориҷии  давлатҳои  аъзои Созмони  конфронси исломӣ  баргузор  мегардад. Созмони  конфронси  исломӣ  соли  1969  бо  ташаббуси  Арабистони  Саудӣ  таъсис  ёфта  буд  ва  айни  ҳол 57  мамлакат,  аз  ҷумла, 6  мамлакати   собиқи  шӯравӣ — Озарбойҷон, Қазоқистон,  Қирғизистон,  Тоҷикистон, Туркманистон ва  Ӯзбекистонро  муттаҳид  менамояд. Тоҷикистон 1  декабри  соли 1992  ба  узвияти  созмон  қабул  гардида буд. Қароргоҳи  марказии он  дар   шаҳри  Ҷиддаи  Арабистони  саудӣ  воқеъ  аст. Забонҳои  кории ҷаласаҳои  созмон арабӣ,  англисӣ ва  фаронсавӣ  мебошанд. СКИ  дар   маҷлисҳои  СММ  мақоми  мушоҳид  дорад,   дар  шаҳрҳои  Ню – Йорк ва  Женева  намояндагиҳои  он  фаъолият  доранд. Ҳадафи  фаъолияти  созмон  вусъат  додани  ҳамкорӣ ва  ҳамдилии   мамлакатҳои   исломӣ,  мусоидат ба   барҳам  додани  нажодпарастӣ ва  мустамликадорӣ,   амалӣ  сохтани   тадбирҳои  зарурӣ  барои   таъмини  сулҳу  амнияти  байналхалқӣ  дар  заминаи  принсипҳои   адолат,  ҳамоҳанг  сохтани тадбирҳо  барои озод  кардан  ва   муҳофизат  намудани  ҷойҳои  муқаддаси   ислом, дастгирии  муборизаи  халқи  Фаластин ва  расонидани  кӯмак барои  барқарор  сохтани ҳуқуқи  қонунӣ  ва  озод  намудани  қаламрави он,  дастгирии  муборизаи   халқҳои  мусулмон  барои   ба  даст овардани  истиқлолият ва ҳуқуқҳои  миллӣ,  муҳайё  сохтани  шароити  зарурӣ барои   вусъат  бахшидани   ҳамкории  давлатҳои  аъзои  созмон  бо  мамлакатҳои  дигар   мебошад. Мухбири  АМИТ «Ховар»  хабар  медиҳад, ки   иҷлосияи  36 – уми  СКИ моҳи  майи  соли  2009  дар  Димишқ  баргузор  гардида  буд.