ПАЛАТАИ САВДО ВА САНОАТ 50 – СОЛА МЕШАВАД

Душанбе, 26 март. (АМИТ «Ховар», Лаззат Диловарзод).-  Хизмати Палатаи савдо ва саноати ҷумҳурӣ барои аҳолии кишвар дар давоми ним асри мавҷудияташ кам нест. Айни замон, 460 корхона ва ташкилот ба аъзогии ҳақиқии Палатаи савдо ва саноат қабул карда шудааст, ки калонтарини онҳо ширкатҳои «ТАЛКО», «Текстилмаш», «Текстил», «Тоҷиккабел», «Зарафшон», «Востокредмет», «Гулистон» ва боз даҳҳо ширкату ҷамъиятҳои саҳҳомӣ мебошанд. Дар давоми 7 соли ахир Палатаи савдо ва саноат ба маблағи 3 млн. 676 ҳазор сомонӣ ба иштирокчиёни ҶБВ, оилаҳои кабизоат, маъюбон ва мактаб – интернатҳо кӯмаки башардӯстона расонидааст. Ба замми ин,  5 ҳазор сокини вилояти Хатлонро аз ташхиси тиббии мутахассисони Федератсияи Русия гузаронида, ба зарардидагони офатҳои табиӣ кӯмаки молиявӣ расонидааст.