ҲУНАРПЕШАГОНИ ИДМ ДАР ДУШАНБЕ ҶАМЪ МЕОЯНД

Душанбе,  1  апрел. (АМИТ «Ховар»,  Людмила  Дубинина ). —  Нимаи  дуюми   моҳи  апрел дар  Душанбе   таҳти  унвони  «Оҳангҳои  дӯстӣ»  бахшида ба  65 – солагии   ғалабаи  халқҳои  шӯравӣ  дар  Ҷанги  Бузурги  Ватанӣ  консерти  калони  идона намоиш  дода  мешавад. Дар  он   овозхонони  машҳури  Русия  ва  мамлакатҳои  дигари  ИДМ  ширкат  меварзанд.  Коргардони  Муассисаи  давлатии  консертӣ ва  сафарҳои  ҳунарии  «Базморо»  Илёс Тиллоев  ба  мухбири  АМИТ «Ховар»  хабар  дод, ки  дар  консерти  мазкур  Ҳунарпешаи  мардумии  Русия Лев  Лешенко, ҳунарпешаи  машҳури  Озарбойҷон  Парвиз  Ҳасанов,  ҳунарпешаи варзидаи  Арманистон Сергей  Обосян,  ҳунарпешаи  гурҷӣ Сосо Павлиашвили,  овозхони  белорусӣ  Анатолий Ярмолник,  овозхони литвонӣ Лайма  Вайкуле,  овозхони  украинӣ Таисия Повалий,  мутриби  эстонӣ  Анне Вески ва   овозхони тоҷик  Рустам  Исоев   ширкат  хоҳанд  варзид. Барномаи  консерт  баробари  сурудҳои  солҳои  ҷанг сурудҳои  машҳури  эстрадиро дар бар  мегирад, ки  писанди  ҳаводорони  ҳунару  мусиқӣ  гардидаанд.