БАҲСИ ТОҶИКИСТОНУ ӮЗБЕКИСТОН ПОЁН ЁФТ

Душанбе, 12 апрел. (АМИТ «Ховар», Бекназари Абӯбакр). — Тайи чор панҷ моҳи охир миёни Корхонаи воҳиди давлатии «Тоҷикгаз» ва «Узтрансгаз» оид ба масъалаҳои техникӣ ва молиявӣ баҳс кашол дошт. Муовини аввали раиси КВД «Тоҷикгаз» Шавкат Шоимов дар сӯҳбат бо мухбири АМИТ «Ховар» гуфт, ки баҳси байни «Тоҷикгаз» ва «Узтрансгаз» аслан сари ҳаҷмҳои интиқолӣ ва маблағи пардохти он  буд, ки давоми чанд моҳи охир кашол ёфт. «Хушбахтона, ин масъала зимни мулоқоти масъулини ин ниҳодҳо, 9 апрели соли равон дар шаҳри Тошканд ҳалли худро ёфт ва «Тоҷикгаз» мутобиқи дархост ва талаботи истеъмолкунандагон аз «Узтрансгаз» бемамоният газ интиқол медиҳад», — идома дод Ш. Шоимов. Ёдовар мешавем, маблағе ки асос ба ин нофаҳмиҳо ва баҳсҳо буд, 700 ҳазор доллари ИМА-ро ташкил мекард.