ЛОИҲАИ РУШДИ ДЕҲОТ ДАР 21 ШАҲРУ НОҲИЯИ ҶУМҲУРӢ

Душанбе, 26 апрел. (АМИТ «Ховар», Лаззат Диловарзод).- Бино ба гуфти директори  Муассисаи давлатии маркази идоракунии «Рушди деҳот» Усмон Сабзов, айни замон аз ҷониби 42 ҷамоати фарогири лоиҳа зерлоиҳаҳои инвеститсионӣ ба маркази идоракунии «Рушди деҳот» барои омӯзишу баррасӣ дохил гардиданд. Самтҳои асосии лоиҳаҳои воридшуда баҳри барқарору коршоям гардонидани иншоотҳои фарсудашуда нигаронда шудаанд. Аз ҷумла, каналҳои обтаъминкунии байнихоҷагиҳо, таъмиру таҷдиди иншоотҳои гидротехникӣ, сохтмони системаи оби нӯшокӣ. Ба эътидол овардани роҳҳои автомобилгарди деҳот, сохтмони пулҳои нав, бунёди боғҳо ва ташкили фермаҳои чорводорӣ равона карда шудаанд ва барои ин 6 млн. доллари амрикоӣ пешбинӣ шудааст.