МАҶЛИСИ КУМИТАИ ТАДОРУКОТ

Душанбе,  5 май. (АМИТ «Ховар», Фарангис  Раҳимова). —  4  май  таҳти раёсати  Сарвазири  мамлакат Оқил  Оқилов   маҷлиси   кумитаи тадорукоти  омода  сохтан   ва гузаронидани  иҷлосияи  37 – уми  Шӯрои   вазирони  корҳои хориҷии  давлатҳои  аъзои  Созмони  конфронси  исломӣ баргузор гардид. Дар  маҷлис  зикр  шуд, ки  аз  18 то  20  майи  соли  равон  бори аввал дар шаҳри  Душанбе  ду  воқеаи   муҳим —  иҷлосияи  37 –уми  Шӯрои  вазирони  корҳои  хориҷии  Созмони  конфронси  исломӣ  ва  пойтахти  фарҳанги  исломӣ  эълон  гардидани  шаҳри  Душанбе  баргузор  мегарданд.  Ин   нишон  медиҳад, ки   мақоми  Тоҷикистон  дар  фаъолияти  Созмони  конфронси  исломӣ торафт баландтар  мегардад. Ба  иҷлосияи  мазкур  тақрибан  100  ҳайат  аз мамлакатҳои дуру  наздик,  аз  ҷумла,  56  ҳайат  аз  мамлакатҳои  аъзои  Созмони  конфронси  исломӣ  даъват  шудаанд. Иҷлосияи  мазкур  аҳамияти  калони сиёсӣ  ва байналхалқӣ  дорад. Бинобар  ин   барои  дар  сатҳи  олӣ   гузаронидани он   ҳамаи  тадбирҳоро  андешидан  зарур  аст,  гуфт  Оқил  Оқилов. Сарвазири  ҷумҳурӣ  дар  фарҷоми  маҷлис  ба  аъзои   Кумитаи  тадорукот  ва  шахсони  дигари  масъул барои   тезонидани  корҳои  тайёрӣ ба  иҷлосия   супоришҳои  дахлдор  дод.