МАҶЛИСИ МУШТАРАК ДАР ДУШАНБЕ БАРГУЗОР ГАРДИД

Душанбе,  24 май. (АМИТ «Ховар»). —  Тибқи  паймони  бадастомада  чанде  пеш  дар  Душанбе таҳти раёсати  муовини раиси Палатаи  ҳисоби  Федератсияи  Русия  Александр  Семиколенних ва  директори  Агентии назорати  давлатии молиявӣ  ва  мубориза ба  муқобили  коррупсия Ҷумҳурии  Тоҷикистон Фаттоҳ  Саидов  маҷлиси  муштараки  ҳар  ду  ташкилот баргузор  гардид. Дар  он   натиҷаҳои тафтиши  қонуният  ва   самаранокии истифодаи  қитъаҳои  замин,  моликияти  манқул  ва  ғайриманқули ба  ихтиёри Пойгоҳи низомии Русия  гузошташуда, шартҳои  буду  боши  хизматчиёни  ҳарбии  Русия дар  қаламрави  Ҷумҳурии  Тоҷикистон  ва риояи  ҳуҷҷатҳои  имзонамудаи  Ҳукуматҳои  Русия  ва  Тоҷикистон  муҳокима  карда шуданд. А.Семиколенних дар оғози  маҷлис  зикр  кард, ки дар  давоми  11  соли   баъди  имзои  созишнома  дар   бораи  мақом  ва  шароити   буду  боши  Пойгоҳи  низомии  Русия  дар  қаламрави  Тоҷикистон  гузашта,  мақомоти  иҷроияи  ҳокимияти  давлатӣ  ва   низомии  ҳар  ду  давлат  дар  бораи таъмини  пойгоҳи  низомии  Русия  бо  захираҳои  зарурӣ  корҳои  зиёдеро ба  сомон расониданд. Ин  ба   хизматчиёни  ҳарбии  Русия имкон  дод, ки  вазифаҳои  ба зимма  гирифтаашонро  ба  манфиати Тоҷикистон  ва Русия  самарабахш  иҷро  намоянд. Намояндагони Палатаи  ҳисоби   Федератсияи  Русия  ва  Агентии  назорати  давлатии   молиявии  Тоҷикистон дар  бораи   натиҷаҳои тафтиши  қонуният  ва  самаранокии  истифодаи  қитъаҳои  замин  ва  моликияти  манқулу  ғайриманқули  ба ихтиёри  Пойгоҳи  низомии  Русия гузошташуда ҳисобот  доданд.   Қарор  дода шуд, ки  дар   бораи  натиҷаҳои тафтиш ба ҳукуматҳои  ҳар  ду  мамлакат  маълумот  пешниҳод  карда шавад.