ЗИЁДА АЗ 1 МЛН. $ АЗ ЯПОНИЯ БАРОИ ДОНИШҶЎЁН ВА ХИЗМАТЧИЁНИ ДАВЛАТИИ ҶТ

Душанбе, 17 май. (АМИТ «Ховар», Фарангис Раҳимова). — Имрўз, 17 майи соли 2010 дар бинои Вазорати корҳои хориҷии Ҷумҳурии Тоҷикистон маросими ба имзо расидани Созишнома байни Ҳукумати Ҷумҳурии Тоҷикистон ва Ҳукумати Ҷопон оид ба донишомўзии донишҷўёни тоҷик дар Ҷопон баргузор гардид. Дар ин бора ба АМИТ «Ховар» аз Вазорати корҳои хориҷии кишвар хабар доданд. «Ҳуҷҷатро Вазири корҳои хориҷии Ҷумҳурии Тоҷикистон Ҳамрохон Зарифӣ ва Сарпарасти Сафорати Япония дар Ҷумҳурии Тоҷикистон Йошихира Накаяма ба имзо расониданд», гуфт манбаъ. «Тибқи муқаррароти Созишномаи мазкур, ҷониби Япония барои донишҷўён ва хизматчиёни давлатии Ҷумҳурии Тоҷикистон барои баланд бардоштани малакаву ихтисос дар Япония дар давоми солҳои 2010-2013 119 миллион йен, ки тақрибан ба 1 285 000 доллари ШМА баробар аст, ҷудо хоҳад намуд», қайд карданд дар Вазорати корҳои хориҷӣ.