МАҶЛИСИ ШӮРОИ ДОИМИИ СААД

Маскав,  25 июн. (АМИТ «Ховар»,  Ҳалима  Хушқадамова). —   24  июн  дар  Маскав  маҷлиси  Шӯрои  доимии  Созмони  аҳдномаи  амнияти  дастаҷамъӣ  баргузор  гардид. Иштирокчиёни он  пешниҳоди  Федератсияи  Русияро  дар  бораи  такмил  додани   роҳу  воситаҳои  вокуниши  дастаҷамъӣ ба  вазъияти  бӯҳронӣ ва  фавқулодда  муҳокима  намуданд.  Қарор  дода шуд, ки   муҳокимаи  масъала  баъди   муқаррар  гардидани  мавқеи  ҳамаи  давлатҳои  аъзои  созмон  давом дода шавад. Муншии  умумии   созмон  Николай  Бордюжа  ба  иштирокчиёни  маҷлис  хабар  дод, ки  ҳайати  зудамали   созмон 25  июн  барои  боздиди корӣ  ба  Қирғизистон  фиристода  мешавад. Гурӯҳи  мазкур   мувофиқи  тавсияҳои  котибони шӯроҳои  амнияти давлатҳои аъзои  созмон  ташкил  ёфтааст. Дар  маҷлис  инчунин  лоиҳаи  изҳороти   сарони давлатҳои   аъзои  СААД   бахшида ба   проблемаҳои  паҳн  гардидани  маводи  нашъадори  Афғонистон ба  мамлакатҳои  минтақа  муҳокима  карда  шуд.  Ҳуҷҷат  бо назардошти  мавқеи   ҷонибҳо   ба  муҳокимаи  сарони давлатҳои  аъзои  созмон  фиристода  мешавад. Дар  маҷлис намояндагони  доимии давлатҳои  аъзои  созмон  иштирок  доштанд.