МУЛОҚОТИ Э. РАҲМОН БО ТЕОДОР АЛЕРС ВА МОТУ КОНИШИ

  2 августи соли 2010 Президенти Ҷумҳурии Тоҷикистон Эмомалӣ Раҳмон Директор Бонки ҷаҳонӣ оид ба стратегия ва амалиётҳо дар минтақаи Аврупо ва Осиёи Марказӣ Теодор Алерс  ва Директори минтақавии Бонки ҷаҳонӣ доир ба кишварҳои Осиёи Марказӣ  Моту Кониширо ба ҳузур пазируфт. Дар мулоқот масоили кунунӣ ва дурнамои ҳамкории Тоҷикистону Бонки ҷаҳонӣ баррасӣ шуд. Сарвари давлат Эмомалӣ Раҳмон ба Бонки ҷаҳонӣ барои ба номгўйи тадбирҳои Стратегияи шарикӣ бо Тоҷикистон ҳамроҳ намудани афзалиятҳои кишвари мо ва ҳамчунин барои кўмаку дастгирии намоён баҳри коҳиш додани таъсири манфии бўҳрони ҷаҳонии молиявию иқтисодӣ арзи сипос намуд. Теодор Алерс  ва Моту Кониши ба Сарвари давлат Эмомалӣ Раҳмон аз натиҷаҳои муҳокимаи масоили вобаста ба сохтмони нерўгоҳи Роғун, ки чанде пеш дар ҳузури роҳбарияти Бонки ҷаҳонӣ сурат гирифта буд, иттилоъ дода, аз ҳавасмандии Тоҷикистон баҳри дар сатҳи баланди байналмилалӣ гузарондани асосноккунии техникию иқтисодӣ ва омўзиши таъсири экологию иҷтимоии ин лоиҳа изҳори қаноатмандӣ карданд. Сарвари давлат Эмомалӣ Раҳмон бори дигар таъкидан изҳор дошт, ки ташхиси лоиҳаи сохтмони нерўгоҳи Роғун бояд дар сатҳе гузаронда шавад, ки ҳеҷ шакку шубҳа ба бехатарии он ба муҳити зист ва низоми обтаъминкунии минтақа боқӣ намонад. Намояндагони воломақоми Бонки ҷаҳонӣ таъкид доштанд, ки «барои амалӣ намудани ин ҳадаф беҳтарин мутахассисони касбӣ, ки дар тамоми ҷаҳон маъруфанд, ҷалб карда мешаванд». Ҳарду ҷониб ҳавасмандии худро ба густариши ҳамкории гуногунҷанба, ки собиқаи қариб бистсола дорад, таъкид намуданд. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.