ҲИФЗИ ҶАНГАЛ – ВАЗИФАИ ПУРМАСЪУЛИЯТ

Душанбе, 20 сентябр. (АМИТ «Ховар», Бекназари Абӯбакр). — Дар қатори ҷангалпарварони ҷумҳурӣ, кормандони соҳаи ҷангали вилояти Суғд низ 79 — солагии ташкилёбии хоҷагии ҷангалро таҷлил намуданд. Ҷангалпарварони вилоят «Барномаи рушди хоҷагии ҷангали Ҷумҳурии Тоҷикистон барои солҳои 2006 – 2015» ва дигар барномаҳои ҷумҳуриявию вилоятиро сармашқи кори худ қарор дода, соли ҷорӣ корҳои зиёдро анҷом доданд. Аз ҷумла, дар майдони 269 гектар ҷангалзори нав бунёд намуда, 1753 гектар майдонро нигоҳубин карданд. Инчунин, 1360 килограмм тухмии дарахтони ҷангал ҷамъоварӣ ва кишти онҳо ба роҳ монда шуд. Ба миқдори 101 ҳазор бех ниҳолҳои мевадиҳандаро бахшида ба 20- солагии Истиқлолияти давлатии Ҷумҳурии Тоҷикистон пайванд намуданд. Соли ҷорӣ дар маъракаи кабудизоркунӣ 21,64 ҳазор бех ниҳоли дарахтони мевадиҳанда ва 40,75 ҳазор бех дарахтони ороишию сояафкан ва 94,0 ҳазор дона қаламчаи сафедор шинонида шудааст. Мавриди зикр аст, ки ба зиммаи ҷангалпарварон муҳофизати арчазор, тӯғайзор ва олами ҳайвоноту паррандагон низ гузошта шудааст. Дар миқёси вилояти Суғд 5 парваришгоҳ, аз ҷумла парваришгоҳҳои «Искандаркӯл» ва «Сой–Вота»-и ноҳияи Айнӣ,  «Зарафшон»-и шаҳри Панҷакент, «Оқтош»–и ноҳияи Ашт мавҷуд мебошанд. Ҳамзамон,  парвариши ниҳоли арчаи зарафшонӣ ба роҳ монда шудааст, ки тибқи  барномаи давлатӣ ҳар сол то 100 ҳазор бех кӯчати он парвариш карда мешавад.