ФАРОВОНИИ МАҲСУЛОТИ КИШОВАРЗӢ

         Фархор, 27 сентябр. (АМИТ «Ховар», Сулаймон Холов). — Кишти тирамоҳии ғалла дар хоҷагиҳои мавзеъи Ӯртабузи ҷамоати деҳоти Гулшани ноҳия, ки  заминҳои ин мавзеъ тавассути пойгаҳҳои обкашӣ обёрӣ  мешаванд, оғоз гардид. Тавре масъулини соҳа иброз доштанд, барои таъмини барномаи амнияти озуқаворӣ мувофиқи дастуру супориши сарвари давлат аҳли заҳмати хоҷагиҳои ноҳия имсол маъракаи кишти тирамоҳии ғалларо нисбат ба соли гузашта як моҳ кабл оғоз намуда, ният доранд, ки то санаи якуми октябр бо риояи тадбирҳои агротехникӣ кишти тирамоҳии ғалларо дар чунин қитъаҳо хушсифат ба анҷом расонанд.         Кишти тирамоҳии ғалла дар хоҷагиҳои деҳқонии ба номи Мадвалии ҷамоати деҳоти Гулшан бо иштироки кормандони раёсати идораҳои кишоварзии шаҳру ноҳияҳои вилояти Хатлон сурат гирифт ва мутахассисони соҳа дар ин чорабинӣ оид ба саривақт гузаронидани кишти зироатҳои барвақтии пиёз, картошка, сабзӣ, ғалладонагиҳо ва истифодаи тухмиҳои хушсифат ба масъулин маълумоти муфассал доданд. Аз ҷумла, кормандони шӯъбаи муҳофизати растаниҳо ва заҳролудкунӣ таъкид доштанд, ки ҳар як навъи тухмӣ барои пешгирӣ аз таъсири ҳашароти зараррасон бо маҳлулҳо шуста сипас кишт  шаванд. Роҳбарияти мақомоти иҷроияи ҳокимияти давлатии ноҳияи Фархор қайд намуданд, ки ин мавсим дар ноҳия майдони кишти пиёзи барвақтӣ ба 200 гектар расонида хоҳад шуд ва дар рӯзҳои наздик дар мавзеи Олимтойи ноҳия низ кишти тирамоҳии ғалла оғоз мегардад, ки корҳои омодагӣ дар ин самт ҷараён дорад. Дар ноҳияи Фархор имсол аз ҳисоби пурсамар истифода бурдани ҳар як қитъа замини корам номгӯи зиёди маҳсулоти кишоварзӣ истеҳсол шуд, ки он ба даромади иқтисодии аҳли заҳмат заминаи мусоид мегузорад.