ОВОЗХОНИ МАШҲУР АЗ ДУБАЙ ОЗИМИ ДУШАНБЕ МЕГАРДАД

Душанбе, 23  сентябр.(АМИТ «Ховар», Марзия Сидова).-Ҳунарманди машҳур Самеъ Юсуф бо сафари нахустини ҳунарӣ ба  Тоҷикистон меояд. Вай рӯзҳои 7-8-уми октябр дар толори «Кохи Борбад» -и Душанбе ду консерт дода, мухлисони худро шод мегардонад.        Сафари ҳунарии Самеъ Юсуф ба Тоҷикистон  бо ибтикори ширкати «Интер-тарона-медиа» сурат мегирад. Дар ин хусус ба АМИТ «Ховар» продюсери консерт Марҳабо Азизова иттилоъ дод. Мавсуф афзуд, ки Самеъ Юсуф бо сафари ҳунарӣ аз Дубай озими Душанбе мегардад. Ӯро дар сафари ҳунарӣ  ба Душанбе беш аз 10 нафар ромишгарону мусиқичиён, ки аз Амрикову Олмон, Мисру Аморати Муттаҳидаи Араб мебошанд, ҳамроҳӣ менамоянд.      Арзиши чиптаҳои консерти Самеъ Юсуф дар Душанбе 150, 200 ва 250 сомонӣ буда, қисме аз маблағҳои аз консерт ба даст омада ба корҳои хайриявӣ сарф карда мешавад.          Бояд зикр кард, ки Самеъ Юсуф ҳамчун сарояндаи сурудҳои форам дар кишварҳои мусулмонӣ маъруф аст. Самеъ Юсуф  аз озаритаборҳои  Эрон буда, соли 1979 дар Теҳрон таваллуд шудааст. Ӯ дар синни се солагӣ ҳамроҳи волидайнаш ба Британияи Кабир ҳиҷрат мекунад ва то ҳол дар шаҳри Лондон  кору зиндагӣ менамояд. Албоми нахустини  сарояндаи маҳбуб ҳанӯз 7 сол муқаддам дар соли 2003 бо номи «Муаллим» /Al-Muallim/ пешкаши  ҳаводоронаш гардид, ки маҳбубияти сарояндаро афзун гардонид. Мавсуф ба як қатор кишварҳои мусулмонӣ сафари ҳунарӣ намуда, бо сурудҳои фораму дилнишини худ ба мусулмонон пайғом расонидааст. Сурудҳои овозхони шинохта дар Ҷумҳурии Тоҷикистон, бахусус,  дар байни ҷавонони он  маҳбубияти хоса касб кардааст.