СОЗИШНОМАИ ШӮРОИ РАИСОНИ СУДҲОИ АРБИТРАЖӢ

           Душанбе, 17 сентябр. (АМИТ «Ховар», Жасмин Назарова). – 16-17 сентябри соли равон дар шаҳри Душанбе Ҷаласаи ҳафтуми Шӯрои Раисони судҳои арбитражӣ, хоҷагӣ, иқтисодӣ ва дигар судҳое, ки парвандаҳоро оид ба баҳсҳо дар соҳаи иқтисодӣ ҳал менамоянд, баргузор гардид.             Дар ҷаласа Раиси Шӯрои раисон, Раиси Суди Олии иқтисодии ҶТ Амирхоҷа Ғоибназаров, мушовири давлатии Президенти ҶТ оид ба сиёсати ҳуқуқӣ, намояндаи баробарҳуқуқи Президенти ҶТ дар Маҷлиси Олии ҶТ Ҷумъахон Давлатов, муовини раиси Суди Олии арбитражии Федератсияи Россия Сергей Амосов ва намояндагони дигар давлатҳо иштирок намуданд.             Бояд қайд кард, ки Шӯрои раисон 7 октябри соли 2002 дар ҷаласаи роҳбарони мамлакатҳои Давлатҳои Иттиҳоди Давлатҳои Мустақил дар шаҳри Кишинёви Ҷумҳурии Молдова дар асоси Созишнома ташкил ёфтааст. Созишномаро Тоҷикистон, Арманистон, Белорус, Қазоқистон, Қирғизистон, Молдова, Россия ва Украина ба имзо расониданд.             Шӯрои раисон бо мақсади ташкили таъмини ҳамкориҳо байни судҳои арбитражӣ, хоҷагидорӣ, иқтисодӣ ва дигар судҳое, ки ваколаташон ба ҳалли баҳсҳои вобаста ба амалигардонии фаъолияти хоҷагидорӣ алоқаманд аст, таъсис ёфтааст.                Вазифаи асосии Шӯро ин маълумоти саривақтии ҳуқуқӣ дар соҳаи ҳалли баҳсҳои иқтисодӣ, татбиқи қонунгузории хоҷагидорӣ, ташкили маслиҳатҳои дуҷониба оид ба тайёр намудани услуб ва роҳҳои мувофиқакардашуда оид ба татбиқи шартномаҳои байнидавлатӣ ва ёрии ҳуқуқии тарафайн дар бораи парвандаҳои гражданӣ, иҷрои ҳалномаҳои судии як давлат дар ҳудуди давлати дигар, мукаммалгардонии муносибатҳо ва ташкили фаъолияти судҳо, тайёр намудани шартномаҳо ва созишномаҳои муайяни байналхалқӣ мебошад, иброз намуд А. Ғоибназаров.