ТАСВИРИ ЗЕБОӢ АЗ НИГОҲИ НАВРАСОН

Душанбе, 20 сентябр. (АМИТ «Ховар», Дилшодаи Ҷонмард).- Тавре аз маркази матбуоти Вазорати фарҳанг ба АМИТ «Ховар» хабар доданд, 21-уми сентябри соли равон бо дастгирии Ҳукумати Ҷумҳурии Тоҷикистон ва Вазорати фарҳанг дар Коллеҷи ҷумҳуриявии рассомони ба номи Мирзораҳмат Олимов Фестивали ҷумҳуриявии «Рассомони наврас» баргузор карда мешавад. Дар фестивал рассомони наврас аз шаҳрҳои Душанбе, Хоруғ, Хуҷанд, Қӯрғонтеппа, Кӯлоб, Ваҳдат, Турсунзода ва ноҳияҳои Рӯдакиву Варзоб ширкат меварзанд. Бояд гуфт, ки  мақсади фестивал бедор намудани ҳисси зебоипарастии наврасон, дастгирии мактаб, студия ва коллеҷҳои тасвирӣ мебошад. Зеро фарҳанги кишвар аз тарбияи насли навини ҷомеа вобастагӣ дорад ва дар ин самт баргузор кардани чунин фестивалҳо саҳми калон дорад. Дар ҳар як асари офаридаи кӯдакон олами аҷиби қудакона, орзӯҳои хаёлӣ, муҳаббат ба диёри Тоҷикистон, табиати он, олами ҳайвоноту наботот инъикос ёфтааст, ки пешкаши бинандагон мешавад.