ҚОНУН БАРОИ ҲАМА ЯК АСТ

Душанбе, 12 октябр. (АМИТ «Ховар», Адибаи Азиз).- Шерхони Одина, Прокурори генералии ҶТ нимаи аввали имрӯз зимни нишасти матбуотӣ изҳор  намуд: Ҳукумат, мақомоти ҳифзи ҳуқуқи ҶТ баҳри бо роҳи осоишта ҳал намудани қазияи водии Рашт тамоми чораҳои дахлдорро меандешанд.      19 сентябри соли равон як гурӯҳ ҷинояткорон дар ноҳияи Рашт ба автомашинаи Вазорати мудофиаи ҷумҳурӣ ҳуҷуми мусаллаҳона карданд, ки дар натиҷа 25 аскари ҷавон кушта шуд. Вобаста ба ин ҳодиса аз тарафи сохторҳои қудратӣ ва мақомоти ҳифзи ҳуқуқи ҷумҳурӣ қарор қабул  шуд, ки дар ноҳияи Рашт амалиёти махсус баҳри безарар гардонидани гурӯҳҳои террористӣ ва экстремистӣ гузаронида шавад.      Дар мавриди муроҷиати шаҳрвандон дар 9 моҳи соли ҷорӣ 213 ариза дида шуд. Баҳри бартараф намудани камбудиву қонунвайронкуниҳои ҷойдошта 1026 санади эътиноии прокурорӣ бароварда шудааст: 480 нафар ба ҷавобгарии маъмурӣ ва интизомӣ кашида шуда, 26 парвандаи ҷиноӣ оғоз гардид.      Салимзода Шерхони Одина   пурсишҳои хабарнигоронро муфассал матраҳ намуда, аз ҷумла дар хусуси қазияи собиқ корманди Кумитаи радио ва телевизиони назди Ҳукумати ҶТ  Ҳуснигул Даминова ҳарф зада гуфт, ки айни замон парвандаи мазкур дар Прокуратураи шаҳри Кӯлоб мавриди тафтиш қарор дорад. Ӯ рафтори Ҳ, Даминоваро  қонуншиканӣ унвон карда, волоияти қонунро новобаста аз ҷинсият ва вазифа қарзи ҳар шаҳрванд донист.