АЗ КОНИ БОДОМ ТО КОНИ ПАХТА

Душанбе, 4 октябр. (АМИТ «Ховар», Лаззат Диловарзод).- Конибодом, ки  таърихан бо макони бодом буданаш маълуму машҳур аст, имрӯз он ба  макони пахта низ  табдил ёфтааст.    Бино ба иттилои сардори Раёсати хоҷагии кишоварзии вилояти Суғд Рустам Раҳимов, ноҳияи Конибодом яке аз аввалин ноҳияҳои вилояти Суғд аст, ки иҷрои нақшаи пахтасупориро ба 55 фоиз расонидааст.    Соли ҷорӣ деҳқонони ноҳияи Конибодом тибқи дурнамои кишоварзӣ 9 ҳазору 500 тонна пахта  ҷамъ оварданианд. Пахтакорони ноҳия ҳар рӯз беш аз 2 фоиз пахта ҷамъоварӣ  мекунанд.    Дар соли 2010 деҳқонон бо сабаби боло рафтани нархи пахта дар биржаи ҷаҳонӣ рӯҳбаланд гардиданд. Онҳо ният доранд дар соли 2011 масоҳати замини пахтаро боз як баробар зиёд намоянд.    Ба гуфти Р. Раҳимов, дар  соли ҷорӣ     барои кишти  пахта 53 ҳазору 977 гектар замин ҷудо карда шудааст. Айни замон ҷамъоварии пахта аз ҳар гектар аз 14 то 30 сентнериро дар бар мегирад.    То 2-юми октябр дар вилоят беш аз 30 ҳазор тонна пахта ҷамъоварӣ шудааст.    Ба иттилои манбаъ, нақшаи солонаи ҷамъоварии пахта 92 ҳазор тонна мебошад, ки иҷрошаванда аст.