БА 48 ҲАЗОР НАФАР МАҚОМИ БЕКОРӢ ДОДА ШУД

          Душанбе, 13 октябр. (АМИТ «Ховар», Лаззат Диловарзод).- Тибқи маълумоти расмии Агентии омори назди Президенти Ҷумҳурии Тоҷикистон, шумораи аҳолии дар иқтисодиёт фаъол (аҳолии машғули кор ва бекорони расман  ба қайд гирифташуда) аз рӯи баҳои пешакӣ дар 9 моҳи соли ҷорӣ 2 млн. 146,8 ҳазор нафарро ташкил дод, ки аз ин 2 млн. 98 ҳазор нафар ё 97,8 фоизи он  ба корҳои  иқтисодӣ машғуланд. Ба 48 ҳазор нафар расман мақоми бекор дода шудааст, ки ин 2,2 фоизи аҳолии дар иқтисодиёт фаъолро ташкил медиҳад.             Аз шумораи умумии аҳолии ба кор машғул шумораи дар рӯйхатбудаи кироякорон дар корхонаҳои ҳамаи шаклҳои моликият 1 млн. 35 ҳазор нафар ё 49, 3 фоизи шумораи умумии аҳолии ба кор машғулро ташкил дод.             Шумораи дар рӯйхатбудаи кормандони кироя дар моҳи август нисбат ба моҳи июли соли ҷорӣ 0,4 фоиз кам  шудааст.             Шумораи кормандони кироя дар соҳаи истеҳсолоти неъматҳои моддӣ дар 9 моҳи соли 2010 нисбат ба ҳамин давраи соли 2009 -0,8 фоиз зиёд ва дар соҳаи ғайриистеҳсолӣ бошад, 0,4 фоиз  кам шудааст.