ИФТИТОҲИ НАХУСТИН ҶАШНВОРА

Душанбе, 13 октябр. (АМИТ «Ховар», Дилшодаи Ҷонмард).-  Имрӯз дар маҷлисгоҳи Вазорати фарҳанги Ҷумҳурии Тоҷикистон маросими ифтитоҳи нахустин Ҷашнвораи хушнависии ЭКО (Еconomic Cooperation Organization) бо ҳузури мақомоти Тоҷикистон, сафирон, намояндагиҳои байналмилалӣ ва шахсиятҳои фарҳангӣ доир шуд. Дар он ҳунари хушнависон аз давлатҳои узви ЭКО — Эрон, Афғонистон, Покистон, Туркия, Қирғизистон, Қазоқистон ва Тоҷикистон муаррифӣ шуданд.   Зимни суханронии хеш Вазири фарҳанги Тоҷикистон Мирзошоҳрух Асрорӣ қайд намуд, ки бори аввал ва маҳз дар Тоҷикистон баргузор шудани чунин як чорабинии бошукӯҳ боиси сарфарозист. «Зеро ин гоми бузург нахуст аз Тоҷикистон шурӯъ шуд ва ин ҷашнвора ба осори сардафтари адабиёти классикии тоҷик Абӯабдулло Рӯдакӣ бахшида шуда, дар он аз ҳамаи кишварҳои узви ЭКО донишмандону хушнависони маъруф ташриф овардаанд»,-гуфт Вазири фарҳанги Тоҷикистон. Ҳамчунин, дар маросими ифтитоҳи нахустин Ҷашнвораи хушнависии ЭКО Раиси  Муассисаи фарҳангии ЭКО Ҳуҷатуллоҳи Аюбӣ  баромад намуда,  ҳадафи баргузор намудани ин ҷашнвораро дар он маънидод кард, ки хушнависӣ аз қадим ҳамчун ҳунар ҳисоб мешуд ва фарҳанги хушнависӣ бояд дар ҷаҳон муаррифӣ карда шавад. Пас аз оғози чорабинӣ дар осорхонаи ба номи Камолиддини Беҳзод  намоишгоҳи осори хушнависони кишварҳои узви ЭКО оғоз шуд, ки он тӯли ду ҳафта аз 13 то 27 октябри соли равон идома меёбад. Ёдрас мешавем, ки ин чорабинӣ бо ибтикори Вазорати фарҳанги Ҷумҳурии Тоҷикистон ва муассисаи фарҳангии ЭКО созмон дода шудааст.