МУЛОҚОТИ М. УБАЙДУЛЛОЕВ БО Л. ВЕЙВЕРЛИ

Душанбе, 4 октябр.(АМИТ «Ховар», Марзия Саидова).-Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев роҳбари гурӯҳи парлумонии Шоҳигарии Муттаҳидаи Британияи Кабир ва Ирландияи Шимолӣ оид ба кишварҳои Осиёи Марказӣ Лорд Вейверлиро, ки бо сафари корӣ дар Душанбе қарор дорад, ба ҳузур пазируфт.           Дар мулоқот Маҳмадсаид Убайдуллоев зикр кард, ки сафари ҳайати  парлумонии Британияи Кабир ба Тоҷикистон дар рушди муносибатҳои байнипарлумонӣ дар доираи  Ёддошти тафоҳуми байни гурӯҳи дӯстӣ ва ҳамкории Маҷлиси миллӣ ва гурӯҳи парлумони Британияи Кабир  самараи нек медиҳанд. Он ҷиҳати пур кардани холигии робитаҳои байнипарлумонӣ, ҳамкориҳои густурдаро ба роҳ мемонад. Потенсиали парлумонҳои ҳар ду кишвар барои ташкили заминаи мусоиди ҳуқуқӣ мавриди истифода қарор мегиранд. Зикр шуд, ки дар шароити бӯҳрони молиявӣ ҳамкориҳои судманд бо фароҳам овардани заминаҳои ҳуқуқӣ имкон хоҳад дод, ки дар рушди муносибатҳои вусъатёбанда такони ҷиддӣ ба миён ояд. Барои баррасии лоиҳаи Созишномаи Ҳукумати Ҷумҳурии Тоҷикистон оид ба ҳавасмандгардонӣ ва ҳимояи муштараки сармоя, ки ба унвонии кишвари Британияи Кабир пешниҳод гардидааст,  барои  расидан ба ҳадафҳои созанда метавонад заминаи воқеӣ гузорад.              Дар ин радиф густариши муносибатҳо дар бахшҳои татбиқи лоиҳаҳои мутақобилан муфид дар соҳаҳои иқтисодию инвеститсионӣ, гуманитарӣ мувофиқи мақсад аст. Масъалаи ташкили квотаҳо барои таҳсили донишҷӯёни тоҷик дар мактабҳои олии Британияи Кабир,  бахусус,  Оксфорд ва Кембриҷ, инчунин таъсиси литсейҳои тоҷикиву бритониёӣ чун замина барои дохилшавии довталабон ба ин донишгоҳҳо матраҳ гаштанд.              Лорд Вейверли афзуд, ки бо истифода аз ваколаташ барои таҳкими ҳамкориҳои иқисодию тиҷоратӣ, гумманитарӣ ва густариши муносибатҳои байнипарлумонӣ  тадбирҳои судмандро меандешад, то фаъолияти гурӯҳҳои дӯстӣ ва ҳамкории байнипарлумонии ҳар ду кишвар ҳадафрас хоҳад буд.              Ёвари Раиси ММ МО ҶТ Шавкат Саидов итилоъ дод, ки мулоқот дар фазои ҳусни тафоҳум ба анҷом расид. Дар мулоқот Сафири фавқулодда ва мухтори Шоҳигарии Британияи Кабир ва Ирландияи Шимолӣ дар  Ҷумҳурии Тоҷикистон Тревор Мур иштирок дошт.