НАРХИ НАВЗОД 400 ДОЛЛАР

Душанбе, 12 октябр. (АМИТ «Ховар», Мавҷуда Анварӣ).-Дар натиҷаи гузаронидани чораҳои фаврӣ-ҷустуҷӯӣ 11 октябри соли ҷорӣ кормандони ШКД ноҳияи Ваҳдат шаҳрванд Бобоева Мария Раҳматуллоевна соли таваллудаш 1989, истиқоматкунандаи ҷамоати деҳоти Нӯъмон Розиқ, к. Чашма11-ро дастгир  намуданд, ки номбурда 26 сентябри соли 2010 тифли навзоди ҷинсаш мардро бо маслиҳати пешакӣ бо модараш Хоҷаева Шарифа Саъдуллоевна, соли таваллудаш 1963, истиқоматкунандаи ноҳияи мазкур ба шаҳрванд Забирова Гулсара Маҳмадаминовна, соли таваллудаш 1983, истиқоматкунандаи ҷамоати деҳоти Дустӣ бар ивази 400 доллари ИМА фурўхтааст. Аз рӯи ҳодисаи мазкур парвандаи ҷиноятӣ кушода шудааст. Дар ин бора Маҳмадулло Асадуллоев-сардори  маркази матбуоти ВКД ба хабарнигори АМИТ «Ховар» хабар дод.