ҶАРИМА БАРОИ ҲУҚУҚВАЙРОНКУНӢ

       Душанбе, 22 ноябр. (АМИТ «Ховар», Дилшодаи Ҷонмард).-  Хоҷагии  деҳқонии ба номи  «А.Мирзоев»-и ноҳияи  Турсунзода   аз  ҳисоби  музди  меҳнат ба  маблағи  475000 сомонӣ  қарздор   мебошад. Мутобиқи  ҳисоботи  меҳнатии  оморӣ  ба  ҳисоби  миёна  дар  давоми  соли  2010 шумораи  кормандони  дар  хоҷагӣ  фаъолияти  меҳнатӣ  дошта 1800  нафарро  ташкил  менамояд. Аз  тарафи  сардори  шӯъбаи  Хадамоти назорати меҳнат дар  минтақаи  Ҳисор ба  хотири  бартарафсозии  қарздории  музди меҳнат сармуҳосиб  ва  роҳбари  хоҷагии  деҳқонии А.Мирзоев  мутобиқи  талаботи  моддаи 134 Кодекси  ҳуқуқвайронкунии маъмурӣ  ба  ҷавобгарии  маъмурӣ  кашида шуда, ба  андозаи аз  700 то 2450 сомонӣ  ҷарима  карда шудааст.             Ин  аст, ки бо  дахолати  мутахассисони Хадамот  376 ҳазор  сомонии  қарздории музди  меҳнат дар  давоми  даҳ моҳи  соли  2010 бартараф   гардид. Қарздории  музди  меҳнат  ба  ҳолати  1  ноябри  соли 2010 – ум  99000  сомониро  ташкил  менамояд.