ФБА БАРОИ ТОҶИКИСТОН 20 МИЛЛИОН ҚАРЗ ҶУДО НАМУД

Душанбе, 25 ноябр. (АМИТ «Ховар», Лутфия Эшонқулова).-  Қарор дар мавриди ба Ҷумҳурии Тоҷикистон ҷудо намудани қарз дар ҳаҷми зиёда аз 20 миллион доллари ИМА  аз ҷониби Фонди Байналмилалии Асъор 24 ноябри соли ҷорӣ қабул гардид. Дар ин бора дирӯз дар нишасти матбуотии барои хабарнигорони ватанию хориҷӣ доиргардида намояндаи доимии Фонди Байналмилалии Асъор дар Тоҷикистон Ари Айзен хабар дод.                Ӯ зикр намуд, ки Шӯрои иҷроияи ФБА шарҳи сеюмро аз рӯи Барномаи  васеъ намудани тартиби қарздиҳӣ дида баромад. Бояд гуфт, ки барномаи мазкур ба расонидани кӯмак ба давлатҳои даромади кам дошта нигаронида шудааст.   Қарз ба Тоҷикистон дар чаҳорчӯби Барномаи мазкур ҷудо гашта, барои барқарор намудани иқтисодиёти кишвар равона мегардад.    «Марҳилаи имтиёзноки қарзи ҷудогардида 5, 5 солро дар бар гирифта, мӯҳлати баргардониданаш 10 сол мебошад», афзуд А. Айзен.