ЛОИҲАҲО АМАЛӢ МЕШАВАНД

   Душанбе, 30 ноябр. (АМИТ «Ховар», Лаззат Диловарзод).- Корхонаи воҳиди давлатии «Хоҷагии манзилию коммуналӣ» -и ҷумҳурӣ дар ҳамкорӣ бо Бонки Ҷаҳонӣ дар маркази 8 шаҳру ноҳияҳои кишвар, аз ҷумла, Қӯрғонтеппа, Кӯлоб, Ваҳдат, Данғара, Восеъ, Рашт, Конибодом ва Истаравшан лоиҳаи рушди инфрасохтори маҳаллӣ (коммуналӣ) — ро амалӣ мегардонад,- иттилоъ доданд дар КВД «Хоҷагии манзилию коммуналӣ» ба мухбири (АМИТ «Ховар».    Ба гуфти ҳамин манбаъ, дар марҳилаи сеюми лоиҳа корҳои барқарорсозии системаҳои таъмини оби нӯшокӣ дар    шаҳру ноҳияҳои Қӯрғонтеппа, Кӯлоб, Восеъ, ки  ба маблағи умумии 8 млн. 149 ҳазор сомонӣ  пешбинӣ шудааст, то имрӯз   ба маблағи 389 ҳазору 700 сомонӣ  корҳо иҷро карда шудаанд.    Корхонаи воҳиди давлатии «Хоҷагии манзилию коммуналӣ» баҳри ҷалби сармоягузории хориҷӣ аз тамоми ташкилоти байналмилалии молиявӣ ва ватанӣ  бо мақсади дар амал татбиқ намудани лоиҳаҳои  маблағгузор (инвеститсионӣ) даъват ба амал овардааст.    Дар сурати пурра амалӣ шудани лоиҳа, қисмати ҷанубии кишвар бо оби софи ошомиданӣ таъмин хоҳад шуд.