10 ВАРЗИШГАРИ БЕҲТАРИНИ СОЛИ 2010-УМ

Душанбе, 21 декабр. (АМИТ «Ховар», Пайрав Назаров).-Ассотсиатсияи журналистони риштаи варзиши Тоҷикистон (АЖРВТ) 10 варзишгари беҳтарини соли 2010-умро муайян кард. Ба иттилои раиси АЖРВТ Нарзулло Латифов бар асоси назархоҳии шореҳони варзиш ба рӯйхати беҳтарин варзишгарони Тоҷикистон дар соли 2010-ум инҳо дохил шуданд: Дилшод Назаров – қаҳрамони Бозиҳои XVI осиёӣ, барандаи ҷоизаи нуқраи Ҷоми ҷаҳон, ғолиби бисёркаратаи мусобиқоти байналмилалии Гран-при оид ба гурзандозӣ, Расул Боқиев – барандаи медали биринҷии Бозиҳои XVI осиёӣ, ғолиби давраи Ҷоми ҷаҳонии дзю-до ва дорандаи нишони нуқраи Ҷоми Аврупо, Муродҷон Тӯйчиев — барандаи медали биринҷии Бозиҳои XVI осиёӣ оид ба гуштии юнониву румӣ, қаҳрамони ҷаҳон оид ба гуштии камарбандӣ, Ҷаҳон Қурбонов – барандаи медали биринҷии Бозиҳои XVI осиёӣ оид ба бокс, Набимуҳаммад Хоркашев — барандаи медали нуқраи мусобиқаи қаҳрамонии ҷаҳон ва қаҳрамони Осиё оид ба гуштии самбо, Мавзуна Чориева — қаҳрамони Осиё оид ба бокс, Баҳодур Қодиров– барандаи медали нуқраи нахустин Бозиҳои тобистонаи олимпии наврасон дар риштаи гуштии озод, Алишер Аҳмадов — қаҳрамони ҷаҳон оид ба кикбоксинг байни наврасон, қаҳрамони мутлақи Осиё ва барандаи медали нуқраи чемпионати ҷаҳон оид ба таеквон-до ИТФ, Акмал Қодиров — барандаи медалҳои нуқраю биринҷии чемпионати ҷаҳон оид ба армрестлинг байни варзишгарони маъюб, Юсуф Рабиев, капитани дастаи футболи «Истиқлол»-и Душанбе – қаҳрамони Тоҷикистон, барандаи Ҷом ва Суперкубок ё Ҷоми олии Тоҷикистон.  Беҳтарин варзишгарони сол бо ҷоизаҳои Кумитаи ҷавонон, варзиш ва сайёҳии Тоҷикистон, Кумитаи миллии олимпии кишвар ва дипломҳои Ассотсиатсияи журналистони риштаи варзиши кишвар мукофотонида хоҳанд шуд.