«ҲУНАРМАНД» НЕРӮГОҲ СОХТ

        Тоҷикобод, 16 декабр.(АМИТ «Ховар», М. Ризвонов).-Дар  деҳаи  Фатҳободи  ҷамоати деҳоти «Қалъаи  лаби об»-и ноҳияи  Тоҷикобод нерӯгоҳи хурди  барқи  обии  иқтидораш 282  киловат–соат ба  истифода дода шуд. Нерӯгоҳ аз ҷониби   Ҷамъияти  дорои  масъулияти маҳдуди  «Ҳунарманд», ки  сарвараш Саидвоҳид Абдулвоҳидов мебошад ва  бо маблағгузории  Вазорати  энергетика ва  саноат ба  маблағи як  миллиону  400 ҳазор сомонӣ  бо  сифати  баланд сохта  шуда, мавриди   истифода  қарор гирифт.            Кунун  нерӯгоҳ метавонад 500 хоҷагии  деҳаҳои гирду  атроф ва  маркази ноҳия,  касалхонаи  марказӣ,  боғчаи  бачагона,  омӯзишгоҳи  касбии техникиро  пурра бо қувваи  барқи доимӣ  таъмин  намояд, изҳор  дошт  раиси  ноҳия  Махсум  Фозилов ба хабарнигори мо.