СУҒД: БА ТАЪМИРУ ТАҶДИДИ РОҲҲО ЭЪТИБОР МЕАФЗОЯД

Душанбе, 10 декабр. (АМИТ «Ховар», Бекназари Абӯбакр). — Солҳои охир аз буҷети вилояти Суғд барои таъмиру таҷдиди роҳҳои қаламрави  вилоят  маблағҳои зарурӣ ҷудо мешаванд, ки ин иқдом ба ободии роҳҳо мусоидат менамояд. Чунончӣ, соли 2008 барои таъмири  роҳи автомобилгарди  Хуҷанд — Ғафуров 6,2 миллион сомонӣ, соли 2009 барои таъмири роҳи автомобилгарди шаҳри Чкалов — 7 миллион сомонӣ, соли 2010 барои таъмири роҳи автомобилгарди шаҳри Хуҷанд – 8 миллион  сомонӣ  маблағ ҷудо гардида, корҳо босифат ба анҷом расиданд. Ҳамчунин, дар соли 2010 аз буҷети вилоят ҷиҳати пайваст  намудани ноҳияи Зафаробод ва шаҳри Истаравшан тавассути деҳаи Уяс барои сохтмони роҳ ва кӯпрук 250 ҳазор сомонӣ ва  барои таъмири роҳи автомобилгарди Бӯстон — Комсомол-Фармонқурғон — Плотина 50 ҳазор сомонӣ маблағ ҷудо гардид.             Ногуфта намонад, ки дар баробари ин, баъзе роҳҳои ҳудуди вилоят, бахусус шоҳроҳи мошингарди Панҷакент-Айнӣ тайи солҳои зиёд аст, ки таъмирталаб мебошад. Ба иттилои масъулини роҳҳои мошингарди шаҳри Панҷакент таъмири пурраи роҳҳои ноҳия, бахусус шоҳроҳи мошингард аз постгоҳи Ҷартеппа (сарҳади Ӯзбекистон) то маркази ноҳияи Айнӣ дар соли 2011 дар назар дошта шудааст. Зикр бояд кард, ки солҳои охир бори аввал таъмири роҳҳои  автомобилгарди Хуҷанд — Ғафуров, Спитамен — Конибодом бо  таҷҳизоти замонавии “Сэкмер” ба анҷом расонида шуд ва ин таҷриба дар вилоят минбаъд низ идома хоҳад ёфт.