ҚОНУНШИКАНИИ ШАҲРВАНДОНИ ХОРИҶӢ ДАР ПОЙТАХТ

    Душанбе, 24 январ.(АМИТ «Ховар», Марзия Саидова).-17 нафар шаҳрвандони кишварҳои хориҷӣ ки бидуни қайди зист дар Душанбе зиндагӣ мекардаанд, зимни амалиёти реҷаи шиносномавӣ, ки имрӯзҳо дар қаламрави пойтахт идома дорад, боздошт гардида, нисбати онҳо дар асоси талаботи қонунгузории Ҷумҳурии Тоҷикистон чораҳои зарурӣ андешида шудааст.    Ба хабаргузории миллии Тоҷикистон «Ховар» аз Раёсати корҳои дохилии шаҳри Душанбе иттилоъ доданд, ки дар ҷараёни амалиёти густурдаи реҷаи шиносномавӣ наздики 4 ҳазор хонаҳои истиқоматӣ, ки дар онҳо беш аз 64 ҳазор шаҳрвандон истиқомат мекардаанд, санҷида шуда, ҳолати қайди зисти онҳо муайян гардидааст. Бахусус, дар ин амалиёт низ вазъи будубош ва қайди зисти 284 нафар шаҳрвандони давлатҳои хориҷӣ санҷида шудааст.    Афзалияти бештари ин амалиёт боз дар он аст, ки дар ҷараёни он 15 ҷиноят ошкор шуда, 3 нафар ҷинояткори дар кофтуковбуда, дастгир гардидаанд. Дар маҷмӯъ зимни амалиёти реҷаи шиносномавӣ дар пойтахт 261 нафар шаҳрвандон бо ҷурми вайрон намудани реҷаи шиносномавӣ ба ҷавобгарӣ кашида шуданд.   Амалиёти реҷаи шиносномавӣ дар пойтахт дар асоси қарори марбутаи Раиси шаҳри Душанбе ҷиҳати ҳимояи ҳуқуқи шаҳрвандон, таъмини амният ва муайян намудани буду боши шаҳрвандоне, ки бе ҳуҷҷати расмӣ дар пойтахт зиндагӣ менамоянд, то 15 феврал гузаронида мешавад.