ҶУСТУҶӮИ ШАҲРВАНДОНИ БЕҲУҶҶАТ

  Душанбе, 21 январ.(АМИТ «Ховар», Марзия Саидова).-Имрӯзҳо дар пойтахти кишварамон шаҳри Душанбе амалиёти густурдаи низоми шиносномавӣ идома дорад.  Насрулло Хайруллоев муовини аввали Раиси шаҳри Душанбе дар нишасти матбуотӣ ба хабарнигорон гуфт, ки чорбинии мазкур дар асоси қарори Раиси шаҳри Душанбе Маҳмадсаид Убайдуллоев «Дар бораи татбиқи чораҳо оид ба таъмини тартиботи ҷамъиятӣ, амнияти шаҳрвандон, ба низом даровардани низоми шиносномавию буду боши шаҳрвандони Ҷумҳурии Тоҷикистон ва шаҳрвандони хориҷӣ дар ҳудуди марзию маъмурии шаҳри Душанбе», ки 31 декабри соли 2010 ба тасвиб расида буд, амалӣ гардонида мешавад.  Ҷорӣ намудани низоми шиносномавӣ дар шаҳр ҳимояи ҳуқуқи шаҳрвандон, таъмини амният ва муайян намудани буду боши шаҳрвандоне, ки бидуни ягон ҳуҷҷати расмӣ дар пойтахт зиндагӣ менамоянд, ба шумор меравад, афзуд, Насрулло Хайруллоев. Инчунин, оқилона истифода бурдани нерӯи барқ, оби ошомиданӣ, гази табиӣ ва дигар хизматрасониҳои коммуналие, ки тавассути хатҳои муҳандисӣ ба шаҳрвандон интиқол дода мешавад, аз ҳадафҳои дигари ин амалиёт аст.  Ҷиҳати амалӣ гардонидани ин тадбир аз ҳисоби роҳбарону намояндагони сохторҳои марбутаи шаҳрӣ ситод созмон дода шудааст, ки роҳбарии онро муовини аввали Раиси шаҳр ба ӯҳда дорад. Дар ин чорабинӣ ҳамзамон, аҳли ҷамоатчигии пойтахт- раисони маҳаллаҳою шаҳракҳо, соҳибмулкони манзил ва дигар созмонҳои ҷамъиятӣ ҷалб гардидаанд.  Мӯҳлати гузаронидани амалиёти шиносномавӣ дар қаламрави пойтахт, ки аз 15 январ оғоз гардида буд, то 15 феврали соли 2011 идома меёбад. Аз натиҷаи амалиёти низоми шиносномавӣ то 20 феврал ба унвонии Раиси шаҳр ҳисоботи пурра пешниҳод мегардад.