КОРХОНАҲОИ БЕКОР БА КӢ ДАРКОР ?

   Душанбе, 21 январ. (АМИТ «Ховар», Лаззат Диловарзод).- Дар моҳи декабри соли 2010 279 корхона дар шаҳру навоҳии ҷумҳурӣ кор накард,- иброз доштанд дар Агентии омори назди Президенти ҷумҳурӣ ба мухбири АМИТ «Ховар».    Ба иттилои ҳамин манбаъ, аз ҷумлаи корхонаҳои азкормонда дар вилояти Хатлон ҶММ «Консерва», «Нури Дилшод», КМ «Азот», ҶСШК «Шариф», «Орди Ғозималик», «Кӯҳандиз», дар вилояти Суғд ҶММ «Гулистон», «Бародар», ҶСК «Лаъл», ҶСП «Зуҳал», дар шаҳри Душанбе ҶММ «Шоҳона», «Строй — Вин», «39 параллел», «Хиштрез», «Авитсенна», «Рахш плюс», дар ВМКБ ҶСШК «Хуҷаназар», КМ «ВТ — Помир», ва боз даҳҳо корхонаҳо дар ноҳияҳои Рӯдакӣ, Шаҳринав, Ваҳдат, Варзоб, Рашт дохил мешаванд.    Роҳбарони ин корхонаҳо таъкидҳои пайвастаро дар бораи таъсиси ҷойҳои нави корӣ ва беҳ сохтани шароити кору зиндагии мардум фаромӯш кардаанд ва ё лаёқати ташкили корро дар ин корхонаҳо надоранд.    Саволи матраҳ он аст, ки бо маблағи зиёд сохтани корхона ва фаъолият накардани он ба кӣ даркор аст?